ഗ്രാമസഭ / വാർഡ് സഭ എന്താണ്?

ഒരു ഗ്രാമപഞ്ചായത്തിന്റെ ഭൂപ്രദേശത്തിൽ ഉൾപ്പെട്ട ഗ്രാമത്തിലെ വോട്ടർ പട്ടികയിൽ പേര് ചേർത്തിട്ടുള്ള എല്ലാ വോട്ടർമാരും ചേർന്നതാണ് ആ ഗ്രാമത്തിന്റെ ഗ്രാമസഭ. അതുപോലെ, ഒരു മുനിസിപ്പാലിറ്റിയിലെ വാർഡിലെ വോട്ടർ പട്ടികയിൽ ഉൾപ്പെട്ട എല്ലാ വോട്ടർമാരും ചേർന്നതാണ് ആ വാർഡിന്റെ വാർഡ് സഭ.

ഗ്രാമസഭ / വാർഡ് സഭ അംഗങ്ങൾ

ഒരു ഗ്രാമപഞ്ചായത്തിലെ വാർഡിലെ വോട്ടർ ആ വാർഡിലെ ഗ്രാമസഭയിലെ അംഗമാണ്. അതുപോലെ, മുനിസിപ്പാലിറ്റിയിലെ ഒരു വാർഡിലെ വോട്ടർ ആ വാർഡ് സഭയിലെ അംഗവുമാണ്.

കൺവീനർ

ഗ്രാമസഭകളുടെ കൺവീനർമാർ ഗ്രാമപഞ്ചായത്തിലെ വാർഡ് അംഗങ്ങളാണ്. വാർഡ് സഭകളുടെ കൺവീനർമാർ മുനിസിപ്പാലിറ്റിയിലെ വാർഡ് കൗൺസിലർമാരാണ്.

കൺവീനർക്ക് തന്റെ ചുമതലകൾ നിർവഹിക്കാൻ സാധിക്കാത്ത സാഹചര്യത്തിൽ, ബന്ധപ്പെട്ട തദ്ദേശസ്വയംഭരണ സ്ഥാപനത്തിന്റെ അധ്യക്ഷന് സമീപ വാർഡിലെ ഒരു അംഗത്തെ താൽക്കാലിക കൺവീനറായി നിയോഗിക്കാവുന്നതാണ്.

അദ്ധ്യക്ഷൻ

ഗ്രാമപഞ്ചായത്ത്

ഗ്രാമസഭാ യോഗങ്ങൾക്ക് ഗ്രാമപഞ്ചായത്ത് പ്രസിഡന്റാണ് അദ്ധ്യക്ഷത വഹിക്കേണ്ടത്. പ്രസിഡന്റിന്റെ അസാന്നിധ്യത്തിൽ വൈസ് പ്രസിഡന്റും, ഇരുവരുടെയും അസാന്നിധ്യത്തിൽ കൺവീനറും അദ്ധ്യക്ഷത വഹിക്കും.

മുനിസിപ്പാലിറ്റി

വാർഡ് സഭാ യോഗങ്ങൾക്ക് മുനിസിപ്പൽ ചെയർപേഴ്‌സൺ അദ്ധ്യക്ഷത വഹിക്കണം. ചെയർപേഴ്‌സന്റെ അസാന്നിധ്യത്തിൽ ഡെപ്യൂട്ടി ചെയർപേഴ്‌സൺ, അല്ലെങ്കിൽ ചെയർപേഴ്‌സൺ നിർദ്ദേശിക്കുന്ന സ്റ്റാൻഡിംഗ് കമ്മിറ്റി ചെയർമാൻ, അവരുടെ അസാന്നിധ്യത്തിൽ കൺവീനർ എന്നിവരാണ് അദ്ധ്യക്ഷത വഹിക്കുന്നത്.

യോഗം വിളിച്ചുചേർക്കൽ

ഗ്രാമസഭയുടെയോ വാർഡ് സഭയുടെയോ യോഗങ്ങൾ വിളിച്ചുചേർക്കുന്നതിനുള്ള ഉത്തരവാദിത്വം കൺവീനർ കൂടിയായ വാർഡ് അംഗത്തിനാണ്.

ക്വാറം

ഗ്രാമസഭയുടെയോ വാർഡ് സഭയുടേയോ ക്വാറം ആകെ വോട്ടർമാരുടെ 10 ശതമാനം ആയിരിക്കും.

ക്വാറം തികയാത്തതിനാൽ മാറ്റിവെച്ച യോഗം വീണ്ടും ചേരുമ്പോൾ, ആ യോഗത്തിന് ആവശ്യമായ ക്വാറം 50 അംഗങ്ങൾ ആയിരിക്കും.

പ്രത്യേക യോഗം വിളിക്കാനുള്ള അവകാശം

ഒരു വാർഡിലെ ആകെ വോട്ടർമാരിൽ 10 ശതമാനത്തിൽ കുറയാത്ത എണ്ണം വോട്ടർമാർ രേഖാമൂലം ആവശ്യപ്പെട്ടാൽ, ഗ്രാമസഭയുടെയോ വാർഡ് സഭയുടെയോ പ്രത്യേക യോഗം 15 ദിവസത്തിനകം കൺവീനർ വിളിച്ചുചേർക്കേണ്ടതാണ്.

കോ-ഓർഡിനേറ്റർ

ഗ്രാമപഞ്ചായത്തോ മുനിസിപ്പാലിറ്റിയോ തീരുമാനിക്കുന്ന ഒരു ഉദ്യോഗസ്ഥൻ ഗ്രാമസഭയുടെയോ വാർഡ് സഭയുടെയോ കോ-ഓർഡിനേറ്റർ ആയി പ്രവർത്തിക്കും.

ഗ്രാമസഭ/വാർഡ് സഭയുമായി ബന്ധപ്പെട്ട എല്ലാ പ്രവർത്തനങ്ങളിലും കൺവീനറെ സഹായിക്കുക എന്നതാണ് കോ-ഓർഡിനേറ്ററുടെ പ്രധാന ചുമതല.

ചോദ്യങ്ങളും നിർദ്ദേശങ്ങളും

ഗ്രാമസഭയിലോ വാർഡ് സഭയിലോ പരിഗണിക്കേണ്ട വിഷയങ്ങളെ സംബന്ധിച്ച ചോദ്യങ്ങളും നിർദ്ദേശങ്ങളും യോഗത്തിന് മുമ്പോ യോഗം നടക്കുന്നതിനിടയിലോ എഴുതി സമർപ്പിക്കുവാൻ അംഗങ്ങൾക്ക് അവകാശമുണ്ട്.

പ്രമേയങ്ങൾ

ഗ്രാമസഭയുടെയോ വാർഡ് സഭയുടെയോ അധികാര പരിധിയിൽ വരുന്ന ഏത് വിഷയത്തെയും സംബന്ധിച്ച് യോഗത്തിൽ ഭൂരിപക്ഷത്തിന്റെ അടിസ്ഥാനത്തിൽ പ്രമേയങ്ങൾ പാസാക്കാവുന്നതാണ്.

ഗ്രാമസഭ / വാർഡ് സഭയുടെ അധികാരങ്ങളും ചുമതലകളും